Nagplano nang sugdan ang pag-apod-apod sa unified I.D. system sa Oktubre 2025 ang buhatan sa Department of Social Welfare and Development (DSWD) ug ang National Council on Disability Affairs (NCDA).
Matod ni DSWD Assistant Secretary for Information and Communications Technology ug Chief Information Officer, Johannes Paulus Acuña, una kini magsugod sa mga piniling local government units.
Karong buwana, matod niya, ubos na sa ‘internal pilot testing stage’ ang ahensya agig pagpangandam sa aktuwal nga roll out sa maong mga IDs.
Ubos sa maong yugto, gitan-aw kon unsaon nga mas epektibo ang paggamit sa bag-ong ID system sa mga PWD.
Ang bag-ong ID system gimugna aron matubag ang giingong pagkaylap sa mga peke nga PWD IDs nga gireklamo sa niaging mga buwan sa tibuok nasud.
Sa umaabot nga mga bulan, sigon niya nga ang yugto sa pagsulay magpadayon hangtod ang pag-apod-apod sa katapusan magsugod sa Oktubre.
Samtang nagpadayon ang testing, ang DSWD nakigtambayayong usab sa Department of Information and Communications Technology (DICT) aron mapalig-on ang mga bahin sa seguridad sa mga bag-ong ID.
Lakip sa mga feature mao ang mas maayong verification system alang sa PWD ID holders pinaagi sa Philippine Identification System database.
Aduna usab kini quick-response o QR code aron mas dali nga matino ang pagkalehitimo sa ID.
Alang sa mga aplikante sa PWD, kinahanglan una nilang ipakita ang ilang national ID.
