Naabtan nga nagbitay gamit ang pisi ang 33-anyos nga inahan samtang ang anak niini nga usa ka tuig ug lima ka buwan nga nagbuy-od nga wala nay kinabuhi sa double-deck nga higdaanan sulod sa ilang giabangang lawak sa Sitio Nangka, Barangay Barrio Luz, dakbayan sa Sugbo, Huwebes sa hapon, Hulyo 17.
Basi sa inisyal nga imbestigasyon sa Mabolo Police Station nga bag-o lang namalhin ang inahan ug anak sa maong dapit, kinsang giingong taga dakbayan sa Bogo./
Nakuha gikan sa lawak ang identification card nga adunay pangalan nga “Laviña Mendoza” ug gigamit sa pag-verify sa pagkatawo sa babaye.
Atol sa pakighinabi usab sa Bombo Newsteam kang ‘Jane’, tapad sa lawak nga giabangan sa mag-inahan nga gatuo lang sila nga ang ilang napanimaho nga baho kay gikan sa patay nga ilaga.
Dugang pa niini nga wala nila kini damha hilabi na nga hilom raman hinuon ug walay langas sila nga namatikdan.
Sumala sa mga taho, ang anak sa tag-iya sa balay niadto sa giabangang lawak aron ayohon ang koneksyon sa kuryente, apan sa iyang pagduol, iyang namatikdan ang baho nga gikan sa maong dapit.
Nakahimo pa kini og panuktok sa pultahan, apan walay mitubag, hinungdan nga nangayo na kini og tabang sa mga opisyal sa barangay.
Pugsanon nga giablihan sa mga barangay personnel lakip ang usa ka konsehal ang lawak ug didto na nila nadiskubrehan ang bata nga nagbuy-od nga wala nay kinabuhi nga nagpakita sa mga timailhan sa pagkadunot, ingon man ang inahan niini nga nagbitay sa pisi nga gihigot sa iyang liog atbang sa higdaanan.
Gihulagway usab ni Brgy. Konsehal Carl Arnoco ang ilang gihimo nga pagrespondi sugod sa pagpangayo og tabang hangtud sa pag-abli diin naabtan ang mag-inahan nga wala nay kinabuhi.
Sa pagkakaron, padayon pa ang pagpanghipos sa mga otoridad og impormasyon kung aduna bay foul play sa kamatayon sa mag-inahan. | via Bombo Koky Cabatingan
