CEBU CITY- Gilusad sa Kagamhanang Dakbayan sa Sugbo ang kampanyang “256K Trees” sa pasiunang pagpananum og 5,000 ka mga bakhaw (mangrove) subay sa backroads sa South Road Properties (SRP) niadtong adlaw sa Biyernes, Hulyo 25, 2025.
Gitakdo kini sa selebrasyon sa International Day for the Conservation of Mangroves diin ang maong coastal planting kay nagtimaan sa pinakaunang aktibidad sa syudad sa target niining pagtanom sa 256,000 ka mga punoan likop tibuok dakbayan sa Sugbp atol sa kadaugan sa administrasyon ni Mayor Nestor Archival Sr.
Sumala pa ni John Joeffrey Dabatos Jr., ang project head sa 256K trees campaign nga matod pa gitakdo nila kini nga launching pagtakna hunas (low tide) aron maugsok ang mga bakhaw og saktong posisyon.
Ang kalihokan kay adunay mga partisipante sa mga nagkadaiyang mga barangay, city departments, civic groups, ug mismong sa mga pribadong organisasyon bisan paman sa hamubo nga notisya niini kanila nga nagpakita lang sa halapad nga suporta ngadto sa kagamhanang dakbayan sa tinguha niini sa pagpakabana sa kinaiyahan.
Samtang bana-bana niini nga adunay kapin 4-5,000 ka mga mangrove propagules nga natanom niadtong adlawa nga kasagaran kay ang species nga Bacau (Rhizophora) nga lumad ug haom sa maong dapit.
Ingon man nga ang buhatan na sa Cebu City Environment and Natural Resources Office (CCENRO) kauban ang project team ang muamuma sa mga tanom aron mulahutay kini sa umaabot pang panahon.
Kahinumduman nga unang gipahibalo ni Mayor Archival ang maong programa niadtong buwan sa Hunyo sa ihap nga 256,000 nga nagsimbolo sa ihap sa mga boto nga iyang nakuha sa nakalabayng piniliay nga maoy nakapadaug kaniya.
