Nakabitbit og dul-an sa $500M direct investment pledges si Presidente Ferdinand Marcos Jr. human sa lima ka adlaw nga state visit sa India.
Sa wala pa mopauli, ang Presidente nagpahigayon og mga miting sa daghang dagkong kompanya sa Bengaluru, India aron palig-onon ang relasyon sa teknolohiya, kahimsog, ug mga sektor sa renewable energy.
Lakip kanila ang Hinduja Group, diin ilang gihisgutan ang pagpalapad sa mga relasyon sa natad sa information technology business process management o IT-BPM, diin ang Hinduja Global Solutions nag-operate sa Pilipinas sulod sa 22 ka tuig ug giila nga pioneer sa industriya sa IT-BPM.
Nakigtagbo usab ang Presidente sa NephroPlus, ang pinakadako nga dialysis network sa Asya, diin gihisgotan ang posibilidad sa pagpalapad sa renal care sa daghang mga Pilipino, hilabi na sa mga komunidad nga kulang sa serbisyo.
Sa laing bulag nga business meeting, ang iSON Group mipadayag og interes sa pagpadayon sa pagpamuhunan sa Pilipinas. Gawas sa digital infrastructure, interesado usab ang grupo nga mosulod sa renewable energy, healthcare, BPO, ug insurance sectors.
Nakigkita usab ang Presidente sa mga executive sa Tata Group, nga aduna nay 6,200 ka mga empleyado sa Pilipinas ubos sa Tata Consulting Services. Gihisgutan sa miting ang mga inisyatibo sa kompanya sa pagbag-o sa digital ug ang kontribusyon niini sa malungtarong pagtubo sa nasud.
