PROVINCE OF CEBU- Nisaad ang Gobernadora sa Sugbo nga si Pamela “Pam” Baricuatro nga paspasan niini ang pagpatrabaho ug pagpa-ayo sa mga guba nga pasilidad sa mga tunghaan sa Poro, Camotes Island.
Ang maong pasalig sa Gobernadora resulta sa pag personal nga pagbisita niini niadtong Biyernes, Agosto 8 sa high school ug elementary campus sa nasangpit nga dapit.
Atol sa iyahang pagbisita, personal nga nasaksihan niini ang mga kritikal nga isyu sa imprastraktura, lakip na ang dili magamit nga mga canteen, guba nga mga classroom, ug dili igo nga mga pasilidad sa Luciano B. Rama Sr Memorial National High School ug Esperanza Elementary School.
Busa, naka hatol si Baricuatro nga gawas sa kagubaon sa pipila kabahin sa maong tunghaan sama sa canteen, nanginahanlan usab kini og usa ka gym.
Subay niini, adunay namugna nga plano ang Gobernadora nga gamiton ang P1.083-billion nga Special Education Fund (SEF) sa probinsiya tungod kay wala man usab kini mapuslan ug magamit nga kwarta gikan sa buhis sa real property ubos sa niaging administrasyon, diin ang maong pundo, gikumpirmar kini ni Provincial Administrator Atty.Ace Durano kalabot sa availability sa pundo kaniadtong Hulyo 2025.
Gitino usab ni Durano nga ang mga tunghaan mamahimo nga mosumite og formal requests nga gipirmahan sa pangu sa eskwelahan ug mga Parents-Teachers Associations (PTA) nga dili na moagi sa DepED Division kay pundo kini sa probinsya.
Dugang niini, hugot nga nagmando si Baricuatro sa mga opsiyal sa tunghaan sa pagpadali sa dokumentasyon aron masugdan dayon ang pag-ayo sa mga gubang luna sa tunghaan, diin, ubos sa Local Government Code of 1991, ang SEF — gikan sa 1% nga bahin sa probinsiya gikan sa real property taxes nga nakolekta sa 44 ka lungsod niini — kinahanglang igasto sa mga proyekto sa edukasyon nga giaprobahan sa Provincial School Board, ug ang Gobernadora mao ang mangulo niini.
