DUMANJUG,CEBU- Gihatagan ni Dumanjug Mayor Gungun Gica og deadline hangtod alas 12 sa udto sa Domingo, Agosto 17, 2025, ang mga residente nga nalambigit sa ilegal nga drugas ug uban pang krimen aron boluntaryong mosurender ug magparehistro sa ilang barangay kapitan.
Sa mitambong nga 37 ka barangay kapitan ug lokal nga kapulisan niadtong Agosto 14, nanawagan si Gica sa mga kanhi ug kasamtangang drug users, pushers, ug kadtong nalambigit sa kapintasan, pagpangawat, o illegal nga armas, nga modangop ug mangayo og tabang.
Sa interbyu sa Bombo Radyo Cebu, giingon ni Gica nga tumong sa inisyatiba mao ang pagtabang sa mga malapason nga makapahiuli sa ilang kinabuhi ug malikayan ang pagkahulog sa mas bug-at nga krimen.
Gihatagan niini og gibug-aton nga ang paggamit sa droga sagad mosangpot sa pagpangawat, pagpanghilabot, ug pagpanglugos.
Giklaro niini, nga walay aresto alang sa mga mosurender, apan mopailawom sila sa senemanang random drug testing nga pagabantayan sa kapulisan ug barangay.
Usa ka semana human sa deadline, ipatawag sa LGU ang mga nituman para sa usa ka dayalogo kauban ang ilang pamilya.
Apan, kadto nga mobaliwala sa deadline mahimong mag-atubang og legal nga aksyon.
Iyang gibutyag nga niadtong 2015, susamang programa ang ilang gipasiugdahan diin 186 ka mga indibidwal ang naaresto sulod sa unom ka bulan. Bisan pa, iyang gipasabot nga ang kasamtangang kampanya nakasentro sa rehabilitasyon, ug dili lang sa pagdakop.
Giawhag usab niya ang kapulisan nga dili lang maningkamot nga mahimong top-performing station, apan manguna sa pagtukod og luwas, limpyo nga komunidad nga gawasnon sa droga ug krimen.
