Nagpahigayon sa unang public hearing karong tuiga ang Regional Tripartite Wages and Productivity Board – Central Visayas (RTWPB-7) aron sa pagtuki sa pagpaumento sa minimum nga suholan sa rehiyon kagahapong adlawa sa Martes, Agosto 19, 2025.
Kini aron sa pagdungog sa habig sa mga mamumuo ug tigpatigayon sa pagpatuman og patas ug maki-angayon nga dayalogo sa mga sektor sa pagpang-empleyo.
Sumala pa ni RTWPB-7 vice-chairperson Jennifer Bretaña nga gipasiugda atol sa unang leg sa minimum wage public hearing ang mga deliberasyon sa minimum nga suholan nagdala kanila sa responsibilidad sa paghimo sa usa ka delikado nga balanse.
Dugang pa nga ang interes sa mga employer kinahanglan usab nga ampingan aron mapadayon ang mga pamatigayob nga nagsustento og mga trabaho.
Apan sa pikas bahin atol sa eksklusibong pakighinabi sa Bombo Radyo Cebu Newsteam kang Howell Villacrusis, miyembro sa Alyansasa mga Mamumuo sa Sugbo/Kilusang Mayo Uno (AMA Sugbo KMU) nga dili pa gihapon kapaigo sa inadlaw-adlaw nga panginabuhi ang minimum nga suholan nga gilatid sa kagamhanan nunot sa nagkataas nga presyo sa palaliton sa batakang mga produkto.
