Gihukmang guilty sa Sandiganbayan si Janet Lim-Napoles ug kanhi mga opisyal sa Technology Resource Center (TRC).
Kini may kalabotan sa pag-diversion sa P7.55 milyones nga Priority Development Assistance Fund (PDAF) ni kanhi Davao del Sur Rep. Marc Douglas Cagas IV.
Gikonbikto usab sa Special Third Division sa Sandiganbayan si Dennis Cunanan, kanhi deputy director general sa TRC, Maria Rosalinda Lacsamana, kanhi TRC group manager, ug Rhodora Mendoza sa National Agribusiness Corporation.
Sa 149 ka panid nga desisyon nga giluwat sa Sandiganbayan, napamatud-ang sad-an sila sa two-counts of grats ug duha ka counts sa malversation samtang sila si Cunanan, Mendoza, ug Lacsamana nakonbikto sa tig-usa ka count sa graft ug malversation.
Si Napoles gisentensiyahan og 12 ngadto sa 20 ka tuig nga pagkabilanggo tungod sa graft, 20 ngadto sa 34 ka tuig alang sa malversation.
Samtang sila si Cunanan ug Lacsamana pahamtangan og unom ngadto sa 10 ka tuig nga pagkapriso sa kasong graft ug 10 ngadto sa 14 ka tuig sa malversation.
Ingon man si Mendoza gisentensiyahan og unom ngadto sa 10 ka tuig nga pagkabilanggo tungod sa graft ug 10-18 ka tuig alang sa malversation.
Ang kaso nisangpot sa pag-endorso ug pagpili ni Cagas sa People’s Organization for Progress and Development Foundation Inc.
(Popdfi) ug ang Social Development Program for Farmers Foundation Inc. (Sdpffi), parehong non-government organizations nga gi-operate ug kontrolado ni Napoles, isip project partners sa distrito sa magbabalaod nga maghatag ug agricultural production packages sa mga konstituwente niini.
Ang Popdfi gikatahong nakadawat og P2.7 milyones gikan sa PDAF ni Cagas samtang P4.85-M napunta sa SDPFFI.
Gimandoan usab sa korte sila si Napoles, Cunanan ug Lacsamana nga mobayad og P2.7-M alang sa malversation ug indemnity fee ngadto sa gobyerno nga adunay samang kantidad sa interes sa Popdfi.
Samtang sa Sdpffi, sila si Napoles ug Mendoza gimanduan usab sa pagbayad og P4.85-M alang sa indemnity sa samang kantidad nga adunay interest rates.
Gipahayag usab sa korte nga base sa General Appropriations Act alang sa mga tuig 2007 ug 2008, walay NGO nga gihinganlan nga implementing agency sa mga proyekto sa PDAF ug ang mga ahensya lamang sa gobyerno sama sa TRC ug Department of Agriculture ang awtorisado sa pagpatuman sa proyekto.
