Namatyagan sa health department sa Probinsya sa Sugbo ang pagsaka sa duha ka gikonsiderer nga makalilisang ug makatakod nga sakit karon lang tuiga.
Sa gipagawas nga datus gikan sa Regional Epidemiology and Surveillance Unit in Central Visayas (RESU-7), aduna kini natala nga 683% nga pagsaka sa mga sakit sama sa hand, food and mouth disease, diin aduna nay 2 ka nakalas nga kinabuhi usab tungod niini nga matang sa sakit sulod sa 8 ka buwan.
Ang datus sa RESU-7 sa Department of Health nagpakita nga ang Probinsya sa Sugbo maoy nag-una sa ihap sa mga kaso sa HFMD sa mga probinsiya ug highly-urbanized nga mga siyudad sa region 7, ug kini basi sa nalikom nga datos sukad niadtong Enero hangtod Agosto 9, ning tuiga, kay matod pa, nga gikan sa 211 nga mga kaso nga adunay zero number of death sa parehas nga panahon sa niaging tuig.
Sa Sugbo, adunay 824 ka mga kaso ug duha ang nakalas, samtang ang Bohol adunay 310 ka mga kaso, Lapu-Lapu 272 nga kasong natala, Cebu city adunay 166, samtang sa Mandaue adunay 79 ka kaso sa HFMD sulod lang sa 8 ka buwan.
Sa susamang datos sa RESU-7, didto napakita usab nga kasagaran nga nataptan niining matang sa sakit mao ang mga kalalakin-an, diin usa ka buwan ang kinabataan nga biktima ug 43 anyos ang mas tiguwang nga na apektaran ug nataptan niini. Samtang ang mga masuso nga gagikan sa usa ka tuig ngadto sa singko anyos, mao ang kasagaran nga nataptan tungod aduna may 1,186 ka mga natala nga kaso sa nasangpit nga age range.
Apan gawas sa HFMD, namatyagan usab sa Provincal Health Office ang pagsaka sa leptospirosis nga kaso sa probinsya, nunot sa ting-uwan nga panahon, diin adunay napuno nga 8 ka mga bag-ong kaso niini gikan sa buwan sa Enero hangtod Agosto 9, 2025, ug aduna nay 37 ka kinatibuk-ang ihap sa kaso sa leptospirosis.
