Nagmalampuson ang gipahigayon nga prosesyon alang sa Pasundayag sa Pagtuo, kagahapong adlawa, Agosto 31, 2025.
Ang Pasundayag sa Pagtuo usa sa mga kalihokan nga gilangkoban sa 456th Founding anniversary celebration ubos na sa administrasyon ni Cebu Governor Pamela “Pam” Baricuatro.
Sa maong kalihokan, ang mga nagkadaiyang lungsod, isla, ug siyudad sa probinsya ug dakbayan sa Sugbo, mapasigarbohong nagpakita sa ilang nagkalain-laing mga santos ug mga relihiyosong mga imahe.
Lakip usab nga nisalmot sa maong prosesyon mao ang mga parish groups, LGU’s, performers, ug mga residente nga usab gikan sa nagkalain-laing lungsod.
Dugang niini, nakita usab ang presensya sa mga kapulisan ug uban pang mga emergency responders isip pagpangandam sa posibleng emerhensya ug usab pagmintinar sa kahusay sa nasangpit nga kalihokan.
Samtang sa pikas bahin, nakuha usab sa Bombo Radyo Cebu team ang habig ni Hon. Red Duterte ang Cebu 5th District Board Member, diin iyahang gipasabot ug mas gipalawman kung unsa ang buot ug tumong sa maong kalihokan.
Matod niya, ang Pasundayag sa Pagtuo usa ka cultural event nga nag-highlight sa paghatag og grand procession sa tanang patron sa Sugbo, dakbayan ug lungsod isip paghatag og dungog ug pasalamat niini sa gibobo nga grasya, ug usab sikbit sa pagsaolog sa hinapos nga selebrasyon sa 456th Founding anniversary.
Kahinomdoman nga niadtong Agosto 30, daan na nga nagpahibaw ang Cebu City Transportation Office ug ubang buhatan kabahin sa mga road closure, kay ang prosesyon sa Pasundayag sa Pagtuo nilabay man sa Mango Ave. ug nagsugod sa Kapitolyo paingun sa Plaza Independencia ning Dakbayan sa Sugbo.
