CENTRAL VISAYAS- Gipamatud-an na usab sa Police Regional Office 7 (PRO7) ang ilang pagka-top performing regional office sa tibuok Pilipinas pagkahuman sa Unit Performance Evaluation Rating (UPER) alang sa Hulyo 2025.
Nakab-ot sa PRO7 ang impresibong kinatibuk-ang iskor nga 87.136, nga usa ka pag-alsa gikan sa ilang Hunyo 2025 iskor nga 86.018.
Milabaw ang PRO7 sa ubang 17 ka regional offices, lakip na ang Police Regional Office 11 (PRO11) nga nakakuha og 80.923 puntos ug Police Regional Office 6 (PRO6) nga adunay 80.236 puntos.
Nagpakita kini sa padayon nga kalamboan sa PRO7 sa mga panguna nga resulta sa administrative compliance, ug operational readiness.
Gidayeg ni Regional Director PBGEN Redrico A. Maranan ang dedikasyon ug propesyonalismo sa mga personnel sa PRO7, nga naghatag ug dungog ug garbo sa rehiyon.
Nagpabilin nga lig-on ang PRO7 sa pagtuman sa mandato sa Philippine National Police sa pagmintinar sa kalinaw ug kahusay, pagpanalipod sa kinabuhi ug kabtangan, ug pagpalig-on sa panag-uban sa komunidad sa Central Visayas.
