Padayon ang pang-apud-apod sa tabang sa Department of Social Welfare and Development (DSWD) og hinabang sa mga biktima sa sunod-sunod nga mga bagyo karong buwan sa Setyembre.
Basi sa pinakaulahing talaan sa DSWD, niabot na sa kapin P176-million ang kantidad sa hinabang nga gihatag niini sa mga apektadong probinsiya.
Naglakip kini sa 232,000 nga mga family food packs alang sa mga bakwit nga pamilya.
Dugang pa niini, giproseso na usab sa DSWD ang pagpang-apod-apod sa hinabang pinansyal ilabina niadtong nawad-an og mga minahal sa kinabuhi atol sa bagyo ug niadtong hingpit nga naguba ang mga panimalay.
Naghinay-hinay na usab og libot si DSWD Secretary Rex Gatchalian sa mga probinsya sa grabeng nakaangkon og kadaot aron masayran kung unsa ang dugang nga hinabang ang mahatag sa gobyerno.
Sa pagkakaron, kapin sa tulo ka milyon ka indibidwal ang naapektuhan sa Habagat, Bagyong Mirasol, Nando, ug Opong sa 15 ka rehiyon sa nasod ug adunay kapin sa 114,000 ka mga residente nga anaa pa sa mga evacuation center.
