Dili na maagian sa bisan unsang matang sa sakyanan ang Piggatan Bridge sa Alcala, Cagayan human kini nahugno niadtong Lunes, Oktubre 6, 2025.
Sa inisyal nga report gikan sa Alcala Municipal Disaster Risk Reduction and Management Office (MDRRMO), ang taytayan nahugno samtang daghang mga trak ang niagi niini.
Sa pagkakaron padayon ang imbestigasyon aron masuta ang hinungdan sa pagkahugno ug kon duna bay naangol sa maong insidente.
Wala pay opisyal nga ihap sa posibleng mga biktima, apan ang lokal nga kagamhanan ug mga awtoridad sa lugar padayon nga nag-monitor sa sitwasyon.
Ang Piggatan Bridge maoy usa sa mga nag-unang dalan sa Alcala nga nagsumpay sa mga silingang lungsod sa Cagayan Valley.
Hagbay rang gisugyo ang rehabilitasyon sa tulay sa rehiyon nga gipasiugda tungod sa katiguwangon niini ug ang epekto sa mga kalamidad.
Sa wala pa kini nga insidente, ang Cabagan Bridge sa Isabela una nga nahugno, hinungdan sa grabe nga pagkabalda sa transportasyon ug pamatigayon sa rehiyon.
Ang sunod-sunod nga pagkahugno sa taytayan nakahatag ug kabalaka sa publiko bahin sa kaluwasan sa imprastraktura sa amihanang Luzon.
Ang Alcala LGU nagpadala na ug mga heavy equipment para sa pagpahigayon ug clearing operations ug assessment.
