Mibisita pagbalik si Presidente Ferdinand R. Marcos Jr. sa amihanang Sugbo karong adlawa, Oktubre 17, aron personal nga susihon usab ang nagpadayon nga rehabilitasyon ug recovery efforts sa mga dapit nga naapektuhan sa 6.9-magnitude nga linog nga miigo sa probinsiya niadtong Setyembre 30.
Nagsugod ang Presidente sa iyang pagbisita sa Bayanihan Village sa San Remigio, milahos dayon kini sa Cebu Provincial Hospital sa Bogo City, ug gitapos ang pagbisita sa pag-inspeksyon sa Tent City sa Barangay Cogon sa Bogo.
Gisuroy usab niini ang San Remigio sa bag-ong natukod nga Bayanihan Village nga nahimutang sa Barangay Poblacion.
Diin kini ang bag-ong lang nakompleto sa Department of Human Settlements and Urban Development (DHSUD) sa pag-turnover sa modular shelter units (MSUs) ngadto sa lokal nga kagamhanan, nga nagtimaan sa pagkompleto sa labing unang “Bayanihan Village” sa probinsiya.
Mapasigarbuhon usab si DSWD Secretary Rex. Gatchalian sa mga natukod nga 5 ka tent city sa Northern Cebu lakip na niini ang anaa sa Bogo City diin adunay kinatibuk-ang 1,227 ka pamilya ang niokupar niini.
Samtang, gikompirmar usab ni Cebu Governor Pamela Baricuatro nga nadawat na sa kagamhanang probinsiya ang tabang nga gisaad ni Presidente Marcos atol sa iyang unang pagbisita niadtong Oktubre 2.
Diin una nga gisaad sa Office of the President ang kinatibuk-ang P180 milyones nga cash donations alang sa mga apektadong LGUs. Diin ang kinabag-an sa hinabang, o P50 milyones, gigahin sa lalawigan sa Sugbo.
Ang ubang mga alokasyon naglakip sa P20 milyones matag usa alang sa Bogo City, Sogod, ug San Remigio, ug P10 milyones matag usa alang sa Bantayan, Daanbantayan, ug Medellin. Dugang P10 milyones usab ang matag usa ang gihatag alang sa Madridejos, Santa Fe, Tabogon, ug Tabuelan.
