Nagplano karon ang Senado nga putlon ang budget sa Department of Public Works and Highways (DPWH) og 15% ngadto sa 20%, nga gitagana alang sa infrastructure fund sa ahensya alang sa tuig 2026.
Matod ni Senate President Vicente ‘Tito’ Sotto III, ang plano sa pagputol gituki uban ni Committee on Finance Chairperson Sen Sherwin Gatchalian, ug ilang gitakdang putlon ang budget sa matag proyekto sa DPWH tali sa nahisgutang porsiyento tungod sa overpricing nga naobserbahan sa nangaging mga proyekto sa ahensya.
Kini human nabutyag ang overpricing sa mga district engineers ug pipila ka opisyal nga giingong nagbayad sa iyang gitawag og ‘proponent’.
Usa ka pananglitan niini mao ang namatikdan ni Gatchalian mao ang P10.3 bilyones nga kantidad sa farm-to-market road projects nga nagsugod sa milabay nga mga tuig sa 2023 ngadto sa 2024.
Nunot niini, nanawagan usab ang Senado sa imbestigasyon sa mga super health centers diin 300 niini ang nasuta nga non-operational.
Sa laing bahin, gikatakdang isumiter sa Senado ang committee reports gikan sa kanhi Senate Blue Ribbon Committee ngadto sa Department of Justice (DOJ), Independent Commission for Infrastructure (ICI) ug bisan sa Office of the Ombudsman.
