TALISAY CITY, CEBU — Gihulagway ni Department of Public Works and Highways (DPWH) Secretary Vivencio “Vince” Dizon nga “poorly planned and poorly executed” ang PHP 1.9 bilyones nga mga flood control projects sa Mananga River human kini mapakyas sa pagpugong sa grabe nga baha nga dala ni Bagyong Tino niadtong Martes sa buntag.
Atol sa inspeksyon sa Sitio Isla Verde, Brgy. San Isidro, Talisay City, kauban nila Mayor Gerald “Samsam” Gullas, DPWH-7 Regional Director Danilo Villa, ug 2nd District Engineer Leslie Anthony Molina, giingon ni Dizon nga wala nakapugong sa tubig baha ang mga natukod nga revetment walls ug maoy hinungdan sa pagbanlas sa tubig ngadto sa mga komunidad.
Sa ulahing tala, pito (7) ang kumpirmadong patay samtang walo (8) pa ang padayon pang gipangita.
Matod pa ni Dizon, mas angay unta nga dam system sa kabukiran nga nagsubay sa Mananga River ang gipatukod aron makontrolar ang kusog nga tubig panahon sa bagyo. Mipasalig siya nga usbon ang plano sa mga flood mitigation projects dili lang sa Talisay City kondili sa tibuok probinsya sa Sugbo, aron malikayan ang kaparehong trahedya.
Isugyot usab sa kalihim nga mapondohan sa sunod nga national budget ang paghimo og bag-ong master plan sa flood control alang sa tibuok Sugbo, nga gisuportahan ni Mayor Gullas ug iyang gipadayag ang kahanduman sa Talisay LGU nga makig-alayon sa DPWH.
Ang proyekto sa Mananga River, nga gipatuman sa QM Builders, mikabat og PHP 1.9 bilyon, kini ang pinakadako nga flood control project sa isla sa Sugbo.
Mipasalig si Dizon nga ipaimbestigahan sa DPWH ang mga kontrata sa proyekto aron masuta kung adunay posibleng anomalya.
