Gipasalig ni Department of Social Welfare and Development Secretary Rex Gatchalian nga adunay igo nga suplay sa relief aid alang sa mga apektadong pamilya, uban ang padayon nga pag-repack sa mga Family Food Packs.
Sumala ni Gatchalian, adunay kinatibuk-an nga 69,000 ka FFPs ang naapod-apod sa mga local government units (LGUs), lakip ang mga siyudad nga labing naapektuhan sama sa Cebu City, Mandaue City, ug Talisay City.
Ingon man nga adunay gibana-bana nga 200,000 ka FFPs ang itunol karong adlawa, Sabado.
Ang maong lakang kay subay usab sa pakig-alayon ni Presidente Ferdinand “Bongbong” Marcos Jr. sa ilang buhatan nga isiguro ang mga pagpang apod-apod og mga relief goods sa mga biktima.
Apan, gawas sa mga FFPS, matod sa presidente lakip sa ipang hatag sa DSWD mao ang P5,000 nga cash assistance sa mga pamilya nga adunay partially damaged nga mga balay ug P10,000 sa mga totally damaged nga mga balay, ug depende pa kini sa resulta sa assessment sa ahensya.
Tumong sa maong cash assistance nga idunol sa president, nga makatabang sa mga biktima aron makatukod pagbalik og puy-anan ug hingpit makabangun sa nahiagumang trahedya.
Dugang niini, gimandoan usab sa Presidente ang Department of Human Settlements and Urban Development (DHSUD) nga tun-an ang tabang sa pabalay para sa mga pamilyang nawad-an og pinuy-anan, nga namatikdan nga kadtong naa sa no-build zones kinahanglan nga ibalhin sa mas luwas nga mga lugar.
