Nahibalik na halos tanang kuryente sa Metro Cebu human sa kaylap nga pagkawala nga gipahinabo sa bagyong Tino.
Kini ang gipahibalo sa Visayan Electric, diin nabalik na ang 474,312 sa mga kustomer, o 92.57 porsyento sa kinatibuk-ang customer base niini.
Nagpadayon gihapon ang mga crew sa pagtrabaho 24 oras aron makonektar pag-usab ang nahabilin nga mga apektadong lugar.
Basi sa taho, 99.01 percent ang nahibalik na sa San Fernando, 98.66 % sa City of Naga, 98.74% sa lungsod sa Minglanilla, 97.55% sa Consolacion, 96.33% sa dakbayan sa Mandaue ug 94.25% sa dakbayan sa Talisay nga usa sa mga hilabihan nga naapektuhan sa bagyo.
Samtang, inanay usab ang recovery sa Liloan nga anaa pa sa 81.74% ug sa dakbayan sa Sugbo nga anaa palang sa 89.67%.
Mipahinumdom ang VECO nga bisan paman nga mahibalik na ang kuryente kay magpabilin gihapon nga magbinantayon ug mag-amping sa mga linya sa kuryente ug nadaot nga mga kagamitan sa kuryente, ingon man ireport ang padayon nga mga pagkawala sa kuryente pinaagi sa opisyal nga hotline sa Visayan Electric.
