Niabot na sa unom ang gikataho nga namatay human sa kadaot sa Bagyong Uwan sa Pilipinas.
Basi sa datos gikan sa National Disaster Risk Reduction and Management Council (NDRMMC) niadtong Martes, Nobyembre 11, gikumpirmar sa ahensya nga tulo ka namatay ang natala gikan sa Cagayan Valley ug matag usa gikan sa Bicol, Western Visayas ug Eastern Visayas
Samtang 13 ka tawo ang gikataho nga nasamdan.
Tungod niini, kapin sa 2 milyon nga mga indibidwal o katumbas sa kapin 600,000 ka mga pamilya ang naapektuhan sa Ilocos Region, Cagayan Valley, Cordillera Administrative Region, Central Luzon, Metro Manila, CALABARZON MIMAROPA, Bicol, Western Visayas, Negros Island Region, Eastern Visayas, Zamboanga Peninsula, Northern Mindanao, Caraga, ug sa Bangsamoro Autonomous Region in Muslim Mindanao.
Ingon man nga ang pinakadaghang naapektuhan nga mga indibidwal natala sa Bicol nga miabot sa kapin sa usa ka milyon, gisundan sa Negros Island Region ug Eastern Visayas.
Sa mga pamilyang naapektuhan, kapin sa 200,000 ang anaa pa sa mga evacuation center samtang ang uban, kapin sa 78,000 ka pamilya, nagpasilong sa ubang mga lugar.
Sa damage assessment sa ahensya, kapin sa 4,000 ka mga balay ang gitaho nga nadaot, diin kapin sa 3,000 ang gamay nga nadaot ug kapin sa 700 ang hingpit nga naguba.
