POVINCE OF CEBU- Gisang-at sa Office of the Ombudsman-Visayas ang usa ka kriminal ug administratibong reklamo ang batok kang Cebu 5th District Rep. Duke Frasco ug pito ka mga mayor nga gikatahong anaa sa gawas sa nasud atol sa pag-igo sa Bagyong Tino.
Gipasaka ang reklamo, ni Atty. Julito B. Añora Jr. niadtong Martes, nag-akusar sa mga opisyal sa pagbiya sa ilang mga pwesto samtang ang ilang mga lungsod nag-antos sa grabeng pagbaha.
Base sa mga rekords nagpakita nga ang grupo gitugutan nga mobiyahe ngadto sa United Kingdom gikan sa Oktubre 30 hangtod Nobyembre 11, diin gi-isyu sayo pa sa buwan sa Septyembre pipila ka semana sa wala pa si Tino.
Pipila sa mga gipasakaan og kaso mao sila si Liloan Mayor Aljew Fernando Frasco, Catmon Mayor Avis Ginoong-Monleon, San Francisco Mayor Alfredo Arquillano Jr., Tudela Mayor Greman Solante, Pilar Mayor Manuel Santiago, Compostela Mayor Felijur Quiño, Poro Mayor Edgar Rama, ug Borbon Mayor Nico Dotillos, kinsa gikataho nga wala modayun sa pagbiyahe.
Matud ni Añora, nga wala niya gikuwestiyon ang pag-apruba ni Cebu Gov. Pamela Baricuatro sa travel authority apan nangatarungan nga ang mga opisyal kinahanglan unta nga kanselahon o i-postpone ang ilang biyahe sa dihang mitumaw na ang hulga sa bagyo.
Naglakip ang reklamo sa posibleng mga paglapas sa Republic Acts 3019 (Anti-Graft and Corrupt Practices Act), 6713 (Code of Conduct and Ethical Standards for Public Officials), 7160 (Local Government Code), ug 10121 (Disaster Risk Reduction and Management Act), nga tanan nagmando sa mga lokal nga lider nga anaa sa hurisdiksyon panahon sa mga kalamidad.
Giawhag usab ni Añora ang Ombudsman nga imbestigahan ang mga respondents, ug ipaubos sila sa preventive suspension, ug patubagon sila sa gross neglect of duty, grave misconduct, lakip na usab sa dereliction of duty.
Nangayo usab siya og kriminal nga prosekusyon ubos sa Anti-Graft Law, nga adunay mga silot lakip ang pagtangtang sa serbisyo, forfeiture of benefits, ug perpetual disqualification sa public office.
