Personal nga mibisita si Presidente Ferdinand Marcos Jr. sa Negros Occidental aron masusi ang mga panginahanglan sa mga pamilya nga grabeng naapektuhan sa Bagyong Tino ug aron masusi ang gilapdon sa kadaot nga gibilin niini sa probinsya.
Usa sa mga unang lugar nga gisusi sa Presidente mao ang Jose Pepito Montilla Garcia Sr. National High School (JPMGS NHS) sa Brgy. 1, lungsod sa Moises Padilla, diin kadaghanan sa mga classroom ang nalubog sa baha.
Wala usab napugngan nila ni Moises Padilla Public Schools District Supervisor Gideon Panganiban ug JPMGS NHS Principal Mary Grace Ynion ang ilang emosyon sa pagpapaambit sa ilang nasinatian taliwala sa kalamidad.
Busa, gipahayag nila ang ilang sinsero nga pasalamat sa Presidente sa iyang personal nga pagbisita ug pagtagad sa ilang sitwasyon.
Gikan sa eskwelahan, ang Presidente miadto sa Barangay Poblacion aron bisitahon ang mga nawad-an og balay ug personal nga susihon ang mga nadaot nga balay.
Lakip na niini ang paglibot sa lungsod sa La Castellana, diin iyang gibisita ang mga bakwit nga temporaryong nagpuyo sa La Castellana Elementary School (LCES).
Gisusi usab sa Presidente ang Bungahin Steel Bridge sa Brgy. Robles nga nahugno atol sa kakusog sa Bagyong Tino, hinungdan nga naputol ang koneksyon tali sa mga barangay sa kabukiran ug sa lungsod.
Human sa sunod-sunod nga mga inspeksyon, si Presidente Marcos nagpahigayon og situation briefing sa La Castellana Municipal Hall uban sa mga miyembro sa Gabinete gikan sa Department of Energy, Department of Education, Department of Health, Department of Agriculture, Department of Human Settlements and Urban Development, DSWD, ug mga lokal nga opisyal aron mahibal-an ang mga kinahanglanon nga lakang alang sa dinaliang rehabilitasyon.
