Nanawagan og “Marcos Resign” ang nagkalain-laing grupo sa Marcos Resign movement, Masada, Bangon Sambayanan, One Bangsamoro Movement, ug United Taxpayers Against Crime, dungan sa unang adlaw nga lihok-protesta sa transparency and accountability sa Iglesia ni Cristo (INC).
Ang mga grupo nagdala og mga placard nga nag-ingon nga “panubagon ang mga kawatan ug mga tulisan alang sa hustisya, panaghiusa, ug kalinaw.”
Base sa rekord, anaa sa 5,000 ka lain-laing miyembro ang miapil sa panawagan human sa bag-o lang gibutyag ni kanhi Ako Bicol Party-List Representative Elizaldy “Zaldy” Co nga siya ang giingong mastermind sa luyo sa P100 bilyon nga budget insertions sa imprastraktura sa gobyerno, ilabina ang anomaliya sa mga proyekto sa pagkontrol sa baha.
Sumala sa kanhi political adviser ni President Rodrigo Duterte, nga si Jacinto Paras, si President Ferdinand Marcos Jr. ug mga kauban giingong “caught in the act” nga kakunsabo sa korapsyon sa gobyerno.
Samtang, sa panawagan nga tangtangon si Bise President Sara Duterte sa pwesto, giinsistir ni Paras nga ang mga “dilawan” ug “komunista” ra ang responsable niini.
