Nadakpan na sa mga sakop sa Ubay Municipal Police Station ang suspetsado sa pagpamanhig patay sa usa ka Barangay Kagawad sa Purok 1, Barangay San Pascual Ubay Bohol niadtong Martes, Nobyembre 18.
Giila ang suspetsado sa alyas nga si “Joel”, usa ka mag uuma, ug residente sa Purok 4, Brgy. Pag asa, Lungsod sa Ubay diin siya nadakpan pinaagi sa hot pursuit operation sa mga sakop sa Ubay PNP sa pagpangu ni PCPT Amelito Melloria
Base sa initial nga impomasyon, positibong gitudlo sa mga saksi ang suspek nga si alias “Joel” nga maoy mipusil patay kang Brgy. San Pascual Kagawad Jojo Catubig Inalem, samtang gasakay kini ug motor padung sa Barangay Bulilis, pasado alas 6 sa buntag niadtong adlawng Martes, Nobyembre 18.
Matud ni PLTCOL Norman Nuez, tigpamaba sa Bohol PNP, padayon pang gipalawman sa kapulisan ang imbestigasyon sa mao nga kaso diin giingung personal grudge ang gitudlo nga nag-unang motibo, apan ila usab gitan-aw ang posibilidad nga may kalambigitan usab ang iyang trabaho isip Barangay Official.
Sa pagkakaron ang suspetsado anaa na sa kustodiya sa Ubay PNP diin gikatakda nga pasakaan kini ug tukmang kaso.
