Nagpagawas na ang Interpol og red notice batok kang Ronalyn Baterna, ang corporate secretary sa Philippine Offshore Gaming Operations (POGO) firm nga Lucky South 99, sumala sa Presidential Anti-Organized Crime Commission (PAOCC).
Sumala sa tigpamaba sa PAOCC nga si Winston Casio sa usa ka press conference sa Kapihan sa Quezon City niadtong Domingo, Nobyembre 23 nga ang Pilipinas nakadawat sa red notice niadtong Oktubre 13 ug gipadala kini sa ilang opisina sa miaging semana. Apil usab sa red notice si Cassandra “Cassie” Li Ong, usa ka representante sa Lucky South 99, kinsa katapusang nasubay sa Japan.
Ang duha ka opisyal adunay mga warrant of arrest alang sa qualified human trafficking nga may kalabotan sa giingong scam hub sa Lucky South 99 sa Porac, Pampanga, diin 158 ka mga langyaw nga empleyado ang naluwas human nadiskobrehan ang ebidensya sa torture, kidnapping, ug sex trafficking.
Sumala ni Casio, ang PAOCC makig-alayon sa Department of Justice ug sa National Bureau of Investigation aron makigtambayayong sa ilang mga langyaw nga katugbang sa pag-aresto kang Baterna ug Ong.
Sa sinugdanan, gihimakak sa Lucky South 99 ang mga pasangil. Sa miaging husay atubangan sa House Quad Committee, giangkon ni Baterna nga siya ang nag-isyu og mga tseke sa mga kliyente sa kompanya, ang pinakadako nga kantidad kay P500,000, ug nga ang kwarta giingong gikan ni Ong.
