Nipasidaan ang National Task Force to End Local Communist Armed Conflict (NTF-ELCAC) nga mamahimong pahimuslan sa mga komunistang teroristang grupo ang sentimento sa publiko kabahin sa mga anomalosong flood-control projects.
Matud ni NTF-ELCAC Executive Director Usec. Ernesto Torres Jr., nga adunay gahum gihapon ang CPP-NPA-NDF sa pag-impluwensya bisan kung wala na silay aktibong mga gerilya.
Dugang niini nga ang mga rebelde naghimo og tinuyo nga mga lakang aron sulayan nga mabawi ang ilang impluwensya sa mga barangay.
Isip kabahin sa ilang estratehiya sa pagrekrut, gipasiugda ni Torres nga ang grupo mahimong mogamit sa kasuko ug kasagmuyo sa publiko bahin sa mga isyu sa korapsyon aron magrekrut og mga tigpaluyo.
Gihimo ni Torres ang pahayag atol sa selebrasyon sa ikapitong anibersaryo sa NTF-ELCAC.
Sa pagkakaron, matod niya, ang ilang han-ay naka-focus sa pagpadayon sa Barangay Development Program human mawagtang ang aktibong mga front sa NPA.
