CEBU CITY- Andam na ang Dakbayan sa Sugbo sa pag-abot sa Tropical Depression WILMA human gipasaka ang Blue Alert status kagahapon, December 5, 2025.
Gipahibalo ni Konsehal Dave Tumulak, Chairman sa City Council Committee on Disaster Risk Reduction and Management, nga gipatuman ang alert level aron pasidan-an ang publiko ug mga barangay sa posibleng epekto sa bagyo ug aron masiguro ang kahandaman sa pagpanalipod sa kinabuhi ug kabtangan.
Base sa pinakabag-ong datos sa DOST-PAGASA, anaa na sa Signal No. 1 ang Central ug Northern Cebu, diin gilauman ang kusog nga ulan ug hangin nga posibleng modangat sa pipila ka dapit.
Giawhag ni Tumulak ang mga residente, ilabi na ang nagpuyo duol sa suba, ubos nga lugar, ug landslide-prone zones, nga mobakwit sayo ug makig-koordinar sa ilang mga barangay aron malikayan ang pagkadaut nga nasinati sa miaging bagyo.
Sa pikas bahin, samtang ubos na sa tropical cyclone wind signal ang daghang lugar sa probinsya, gi-activate sa Provincial Disaster Risk Reduction and Management Office (PDRRMO) ang Emergency Operations Center alas-5 sa hapon kagahapon, subay sa mando ni Gobernador Pamela Baricuatro.
Nagmando sab si Baricuatro og kompletong imbentaryo sa suplay, sakyanan, ug kagamitan sa bodega sa Kapitolyo aron masiguro nga andam ang tibuok Probinsya sa Cebu sa bisan unsang epekto sa duha ka bagyo.
Subay niini, suspendido gihapon ang mga byahe sa Pantalan sa Dakbayan sa Sugbo. Bisan pa sa suspensyon, adunay gihapong mga turista ug pasahero nga midagsa, naglaum nga aduna pay biyahe karong adlawa, lakip na sila Charlotte Kirkeby ug Tova Lundell, mga turista nga nangita og alternatibong lakaw.
