Nagpagawas og mando ang gobyerno sa dakbayan sa Sugbo nga i-regulate ang paggamit, pag-display, ug pagbaligya sa mga pabuto ning nagsingabot ang kapaskuhan ug bag-ong tuig.
Kini aron masiguro ang kaluwasan sa publiko hinungdan nga ang maong lagda ni-epektibo na niadtong Disyembre 18 ug molungtad kini hangtod sa Enero 1, 2026.
Sa maong lakang, ang mga vendor mahimo lang nga magbaligya og pabuto sa Pond F, South Road Properties (SRP) sa siyudad ubos sa Executive Order no. 47 ug subay sa City Ordinance No. 2290.
Nagpatuman usab ang siyudad og “no permit, no selling” nga palisiya diin kinahanglan una nga mokuha og permit ang mga vendor gikan sa Business Permits and Licensing Office sa siyudad sa dili pa sila awtorisado nga mobaligya og pabuto.
Gidili usab sa mando ang paggamit og pabuto ug uban pang pyrotechnic devices sa mga ospital, klinika, ug mga pasilidad sa panglawas; mga eskwelahan, day care, ug uban pang mga institusyon sa pagkat-on, lakip na ang mga pampublikong park, plaza, ug mga merkado.
Ingon man ang mga awtorisado nga stall sa pabuto kay kinahanglan nga magmintinar og minimum nga distansya nga 6 metros gikan sa usag usa aron makunhuran ang peligro sa sunog ug masiguro ang luwas nga paglihok sulod sa mga lugar nga gibaligyaan.
