Gibutyag ni Batangas 1st District Rep. Leandro Legarda Leviste nga nagbilin siyag mga instruksyon sa pipila ka mga tawo nga ipahibalo sa publiko ang tanan niyang mga file kung adunay daotang mahitabo kaniya.
Gihimo ni Leviste ang pahayag sa Bisperas sa Pasko, pipila ka oras human niya gibutyag sa publiko ang 19 ka pahina nga lista sa mga proponent sa mga proyekto sa Department of Public Works and Highways (DPWH) ubos sa P6.326-trilyon nga 2025 national budget.
Bisan walay espesipikong mga insertion nga gitino sa mga magbabalaod, ang lista nagpakita sa minilyon nga “allocable” nga kantidad nga mahimong igahin sa matag kongresista matag tuig.
Si Leviste miingon nga bisan sa Pasko, siya ug ang iyang inahan, si Senador Loren Legarda, naghisgot gihapon sa iyang trabaho.
Sumala kaniya, iyang gipahinumdoman ang iyang inahan sa iyang direktiba nga kung adunay mahitabo kaniya, ang tanan nga mga dokumento nga nahabilin kinahanglan nga ipagawas ug ang pagbutyag sa impormasyon kinahanglan nga ipadayon.
Wala nganli sa 32-anyos nga magbabalaod ang mga tawo nga iyang gitudlo.
Kabahin niini, iyang gihisgutan usab ang bag-o lang namatay nga kanhi DPWH Undersecretary nga si Maria Catalina Cabral, kinsa giingong mao ang tinubdan sa listahan, human mahulog sa pangpang sa Benguet, usa ka insidente nga giimbestigahan pa sa mga awtoridad.
Sa usa ka bag-o nga interbyu, gikumpirma usab ni Leviste nga iyang gipalig-on ang iyang mga detalye sa seguridad.
