Padayon ang hugot nga kampanya sa kapulisan sa Central Visayas, ilabi na sa Cebu City Police Office (CCPO), batok sa illegal nga pabuto atol sa pagsugat sa Bag-ong Tuig.
Sa pakighinabi sa Bombo Newsteam kang PLt. Col. Jose Los Baños, tigpamaba sa CCPO, gipasabot niini nga gimanduan ang tanang hepe sa mga estasyon sa siyudad nga palig-onon ang anti-firecracker operations, ilabi na sa mga lugar nga dili gi-designate alang sa pagpabuto.
Matod pa, isip kabahin sa padayon nga paningkamot aron malikayan ang disgrasya ug kadaut atol sa selebrasyon, giguba sa Police Regional Office 7 ang mga nakumpiskar nga illegal nga pabuto.
Giawhag usab ni Los Baños ang mga Sugbuanon nga magmatngon ug motuman sa balaod aron masiguro ang malinaw, luwas, ug malampuson nga pagsugat sa Bag-ong Tuig.
Dugang pa, gipahimangnoan usab niini ang mga sakop sa kapulisan nga likayan ang pagpabuto sa personal nga firearms, hinungdan kay kini mahimong magresulta sa administratibo ug kriminal nga kaso, nga posibleng motultol sa ilang pagkataktak sa serbisyo.
