Sugdan na ang pagsuroy sa imahe sa Balaang Bata nga si Señor. Sto Niño nga manukad sa Basilica Minore del Santo Niño, diin una kining ipahamtang sa Cebu South Hospital, Lungsod sa Naga.
Mao kini ang asoy ni Cebu City Councilor Dave Tumulak atoll sa ekslusibong pakighinabi sa Bombo Radyo Cebu Newsteam kaniya.
Gani, iyaha usab nga gikabutyag nga karong hapon lang, dalhon usab ang imahe ngadto sa syudad sa Talisay.
Dugang niini, naugkat usab ni Tumulak ang tinubdan sa maong kalihokan nga niadtong 2016, nasugdan ang maong tradisyon sa Sinulog Festivity sa paghangyo sa mga kaparian sa Basilica nga isuroy ang imaheni Señor. Sto Niño sa tanang mga tambalanan, ug jail facilities.
Sa maong pagsuroy sa imahe sa Balaang Bata, matod ni Tumulak naghatag kini og mga kahigayonan sa mga masakiton nga anaa sa mga tambalanan, paghatag og kahigayonan alang sa mga binilanggo nga mopadangat sa ilahang tagsa-tagsa ka mga pag-ampo, ingun nga dili sila angay nga magpakawala sa paglaom.
Subay niini, ang Imahe ni Sr. Sto. Niño moagi ugmang adlawa sa Brgy. Inayawan alas 8:45 sa buntag, ug mopadung sa Brgy. Kinasang-an, Basak Pardo, Basak San Nicolas, ug mohapit sa St Anthony Mother and Child Hospital sa alas 9:15 sa buntag.
Mogikan usab kini ala 1:00 sa hapon padung sa Cebu City Medical Center (CCMC), moagi sa C. Padilla, N. ug sa Bacalso ala 1:30 sa hapon.
Mobiya kini sa CCMC alas 4:00 sa hapon, dayun padung sa Vicente Sotto Memorial Medical Center (VCMC), ug adto na mag overnight sa VSMMC.
