Giawhag ang mga Pilipino sa Venezuela nga magpabiling mabinantayon ug magpuyo lang una sa sulod sa ilang mga panimalay tungod sa nagkagrabe nga sitwasyon sa seguridad human ang Estados Unidos nagpahigayon og dako nga operasyon ug nadakpan si Venezuelan President Nicolas Maduro.
Sa usa ka post sa Truth Social niadtong Sabado, gikonpirma ni US President Donald Trump nga malampuson ang gihimong strike sa US ug nakuha na nila si Maduro lakip ang asawa niini nga si Cilia Flores gikan sa maong nasod.
Tungod niini, ang Philippine Embassy sa Colombia, nga maoy adunay hurisdiksyon sa Venezuela, nipahinumdom sa mga Pilipino nga mangita og mga luwas nga lugar nga madangpan ug kanunay nga mag-monitor sa mga importanteng balita gikan sa mga kasaligan nga tinubdan.
Giawhag usab sila nga makig-alayon sa ilang isigka-Pilipino pinaagi sa Filcom WhatsApp group ug sigurohon nga ang ilang updated nga contact information napadala na sa embahada.
Alang sa dinalian nga tabang, mahimong mokontak sa mga numero nga +57 310 753 7926 ug +57 310 396 6319.
