Hugot nga seguridad ang ipatuman sa Police Regional Office 7 (PRO7) pinaagi sa pagpatuman og gun ban o ang suspensiyon sa tanang Permits to Carry Firearms Outside of Residence (PTCFOR) sa tibuok rehiyon.
Kini nga lakang tipik sa gipakusgan nga seguridad alang sa dungan nga selebrasyon sa Ika-461 nga Fiesta Señor ug Sinulog Festival, ingon man ang pagpahigayon sa 2026 ASEAN Summit sa Sugbo.
Sumala ni PBGEN Redrico A. Maranan, Regional Director sa PRO7, ang suspensiyon sa pagdala og armas ug eksplosibo gihan-ay, ug ubos niini nga kamandoan, suspendido ang tanang:
-Permiso sa pagdala og armas gawas sa balay (PTCFOR).
-Permit to Transport para sa mga gun clubs, manufacturers, ug dealers.
-Permit sa pagpalit o pagbiyahe og mga eksplosibo.
-Lisensya sa paghimo o pagbaligya og mga pabuto ug pyrotechnics.
-Bugtong ang mga miyembro lamang sa PNP, AFP, ug uban pang law enforcement agencies nga anaa sa opisyal nga duty ug naka-uniporme ang gitugotan nga magdala og armas.
Gipasiugdahan kini nga direktiba subay sa Enhanced Managing Police Operations (EMPO) sa Acting Chief PNP aron masiguro ang hapsay ug malinawon nga mga dagkong kalihokan.
