Gisugdan na sa Kagamhanan sa Probinsya sa Sugbo ang lakang aron matubag ang grabeng kadaot sa mga tunghaan tungod sa 6.9 magnitude nga lindol nga niigo sa amihanang Sugbo niadtong Septiyembre sa miaging tuig.
Pinaagi sa Provincial School Board (PSB), magtukod ang Kapitolyo og mga bag-ong classroom building ug Temporary Learning Shelters (TLS) sa tibuok probinsya.
Gipasiugdahan kini ni Gobernador Pamela Baricuatro, kinsa niasoy nga ang maong mga lawak gidesinyo nga “smart” ug “climate-proof” aron makasugakod sa bisan unsang katalagman sama sa sunog, linog, ug baha. Gihisgutan kining maong programa atol sa tigom sa Provincial Risk Reduction and Management Council niadtong Biyernes, Enero 30, sa Capitol Social Hall.
Ubos niini nga plano, magtukod ang Kapitolyo og mga duha ka andana nga building sa tanang 51 ka local government units sa Sugbo, lakip na ang 44 ka lungsod, unom ka component cities, ug ang dakbayan sa Mandaue, diin ang matag building adunay upat ka classrooms—duha sa ground floor ug duha sa ikaduhang andana, ug ang matag lawak makapahimutang og hangtod sa 40 ka estudyante.
Gisiguro sa Kapitolyo nga moderno ang mga pasilidad diin kompleto kini sa mga lingkuranan, wall-mounted fans, smart interactive panel televisions, whiteboards, ug koneksyon sa WiFi. Alang sa pagdaginot sa enerhiya ug pag-atiman sa kalikupan, mogamit ang mga building og solar energy para sa LED lighting ug solar lamps, uban ang rainwater catchment system nga adunay mga bomba sa tubig.
Gilauman nga mahuman ang konstruksyon sulod sa duha hangtod tulo ka bulan matag building tungod sa paggamit sa wood plastic composite (WPC) nga materyales nga nailang lig-on apan sayon ra itaod.
Dugang niini, magtukod usab ang provincial government og 269 ka Temporary Learning Shelters (TLS) sa 34 ka lungsod aron daling mapahimutang ang mga estudyante nga nawad-an og lawak, ug ang mga tunghaan nga makadawat niini giila na sa Department of Education (DepEd) Cebu Province base sa gihimong assessment human sa linog.
Samtang ang matag TLS butangan usab og mga lingkuranan, boards, ug fans, diin target nga mahuman ang pagtukod sulod lang sa usa ka bulan aron magamit na kini sa pag-abli sa klase karong Hunyo.
Base sa validated assessment nga gipresentar ni Schools Division Superintendent Dr. Senen Priscillo Paulin, niabot sa 570 ka classrooms ang hingpit nga naguba, samtang kapin sa duha ka libo ang nakasinati og major ug minor nga kadaot tungod sa linog.
Tungod niini, gipasiugda ni Gobernador Baricuatro nga ang maong inisyatiba maoy timaan sa lig-on nga komitment sa Kapitolyo sa pagpabalik sa luwas, moderno, ug resilient nga dapit-tunghaan alang sa libu-libong mga estudyanteng Sugboanon nga naapektuhan sa kalamidad.
