Gikumpirmar ni Senate President Pro Tempore Panfilo “Ping” Lacson nga si kanhi House Speaker Martin Romualdez usa sa girekomendar nga mga kaso sa draft report sa Senate Blue Ribbon Committee bahin sa giingong mga anomaliya sa pondo sa mga flood control projects.
Gipasabot ni Lacson nga si Romualdez nahisakop sa ikaduhang kategorya sa mga personalidad nga gihisgutan sa hearing, mga indibidwal kansang mga ngalan mitumaw sa testimonya sa mga saksi apan walay direktang ebidensya nga nagpakita nga nakadawat sila og kwarta.
Bisan pa man og giakusahan siya sa sorpresa nga saksi nga si Orly Guteza nga daw nagdala og kwarta kang Zaldy Co ug Romualdez, kay walay pruweba o direktang ebidensya nga gipresentar nga ang kanhi House Speaker nakadawat og kickback.
Dugang pa, gihisgutan usab sa Senado ang mga alegasyon nga naglambigit kang Romualdez sa mga kontraktor nga sila si Sarah ug Curlee Discaya, kinsa giingong gigamit nga “front” sa pagpalit og usa ka high-end nga propiedad sa Makati City.
Hinuon, gipasiugda ni Lacson nga walay direktang ebidensya nga gisumiter atol sa hearing aron pamatud-an ang mga alegasyon batok kang Romualdez.
Samtang, si Lacson miingon nga ang mga senador gikan sa majority bloc magpahigayon og miting aron hisgutan ang mga isyu nga may kalabotan sa draft report sa Blue Ribbon Committee, hilabi na ang giingong kakulang sa pirma o partisipasyon bisan usa ka miyembro sa majority bloc.
