Patay ang usa ka lalaki human nalambigit sa usa ka hit-and-run accident sulod sa Maria Luisa Village sa Barangay Banilad ning dakbayan sa Sugbo niadtong Dominggo, Pebrero 8, 2026.
Giila ang biktima nga si Kingston Ralph Cheng, 23-anyos, lumulupyo sa maong village ug gikatahong tag-iya sa usa ka coffee shop. Gikatahong dead-on-arrival na ang biktima sa dihang gisuwayan kini og dala sa tambalanan.
Samtang ang suspek kay giilang usa ka 21-anyos nga si Sean Andrew Pajarillo nga gamaneho ug usa ka Toyota Innova nga adunay plakang “GAP 3492.”
Base sa imbestigasyon sa Traffic Enforcement Unit sa Cebu City Police Office sa pagbutyag ni Police LtCol. Jose Los Baños sa Bombo Radyo Cebu News Team nga sa ilang pakigsayod sa panghitabo sa mga saksi, kusog og padagan si Pajarillo sa iyang sakyanan hinungdan nga nabangga kini sa laing awto sa dapit apan nagpadayon kini sa pagpadagan hangtod nga nakaligis na sa pedestrian nga si Cheng diin tungod sa kakusog sa pagka-igo kay nalabay pa kini sa poste sa kuryente.
Imbes nga mutabang kay daling miikyas ang suspek sa panghitabo apan tungod sa iyang way control nga pagmaneho kay nabangga napud kini nga hinungdan sa pagtikyaob sa iyang kotse.
Nakahiagom og samad ang suspek hinungdan nga gidala kini sa tambalanan og kasamtangang gitanggong sa pagproseso na sa mga kapulisan sa iyang kasong atubangon nga homicide.
Padayong awhag sa mga awtoridad sa publiko nga likayan ang pagmaneho og sakyanang kung dili maayu ang kondisyon o impluwensyado sa ilimong makahubog kay mamahimo kining makamugna og aksidente dili lang sa imong kaugalingon apan sa ubang tao nga nakapalibot.
