Gipasalig sa Malacañang nga ang baruganan ni Presidente Ferdinand Marcos Jr. bahin sa relasyon sa Pilipinas sa China nagpabilin nga “lig-on apan diplomatiko.”
Sumala ni Palace Press Officer Usec. Claire Castro, klaro ang baruganan sa Presidente sa pagdepensa sa soberanya ug mga katungod sa nasud, samtang gipadayon ang hapsay ug bukas nga linya sa komunikasyon sa China.
Nipasalig usab ang Malacañang nga ang gobyerno magpabilin nga lig-on sa pagpanalipod sa teritoryo sa Pilipinas samtang gipadayon ang malinawon nga relasyon sa ubang mga nasud.
Ingon man ang pagtahod sa kagawasan sa prensa kalabot sa pahayag sa Embahada sa China nga nagkondenar sa Senate Resolution No. 256.
Matud ni USec. Castro nga gitahod sa Presidente ang katungod sa matag habig sa pagpahayag sa ilang mga panan-aw.
Sumala ni Castro, kung ang China adunay kagawasan sa prensa, mao usab ang bisan kinsang Pilipino ug ang Senado.
Gipahayag ni Castro nga ang Palasyo wala magtan-aw sa pahayag sa Embahada sa China isip usa ka pagsulay sa pagpahilom sa Senado, tungod kay aduna usab kini katungod sa pagsulti ug pagpahayag sa mga sentimento niini.
