Nagpahigayon og balaang misa si Cebu Archbishop Alberto “Abet” Uy sa Cebu Metropolitan Cathedral karong Miyerkules sa Badlis, dungan sa panawagan ngadto sa mga magtutuo nga dili mahadlok sa pagbalik ngadto sa sabakan sa Ginoo.
Sa iyang wali, gipasiugda sa Arsobispo nga ang kalooy sa Diyos walay katapusan ug andam kanunay nga mopasaylo bisan pa sa mga kahuyang ug sala sa tawo.
“Ayaw mo kahadlok sa pag-uli,” kini ang sentro nga mensahe ni Archbishop Uy samtang iyang giawhag ang tanan sa pagpili sa pagpasig-uli o reconciliation kaysa sa kahadlok.
Human sa maong misa, gipahigayon usab ni Archbishop Uy ang bendisyon sa bag-ong gi-renovate nga Adoration Chapel sa Cathedral. Ang maong selebrasyon maoy timaan sa pagsugod sa Lenten Season, diin ang mga Katoliko gipahinumdoman sa paghinulsol ug pagsalig sa Ebanghelyo.
