Gipahibalo sa Cebu City Police Office (CCPO) ang malampusong pagdakop sa suspetsado sa pagpusil-patay kang Konsehal Ramon Diamante sa Barangay Sawang Calero. Ang suspek nasikop atol sa usa ka buy-bust operation sayo sa buntag niadtong Marso 3, 2026, didto sa Sitio Almacin, Barangay Calamba, siyudad sa Sugbo.
Ang suspek nga giilang si alyas “Ven” nadakpan sa mga operatiba sa Police Station 6 ubos sa pagpanguna ni PCPT Giann Karlo M. Reyes, ug nahitabo ang pagdakop human ang suspek nakigtransaksyon sa usa ka poseur buyer alas 5:35 sa buntag, ug nasayran nga dugay na kining gi-monitor sa kapulisan tungod sa iyang kalambigitan sa ilegal nga droga ug sa pagpangatake sa maong konsehal.
Sa gihimong imbestigasyon, nakumpirma nga si alyas “Ven” miyembro sa usa ka gun-for-hire group nga naglihok dinhi sa dakbayan, apan sa wala pa ang iyang pagkasikop, duha na ka kauban sa maong grupo ang unang nadakpan, lakip na ang narekober nga getaway motorcycle, samtang ang usa pa ka miyembro nadiskubrihan nga anaa sa ospital tungod sa samad pinusilan.
Sa pagkakaron, upat na ka miyembro sa grupo ang anaa sa kustodiya sa kapulisan, butang nga giisip nga dakong kalampusan sa kaso.
Sa gikabutyag ni George Ylanan, ang OIC sa CCPO, nakuha gikan sa suspek ang gituohang shabu nga motimbang og 60.06 gramos ug adunay balor nga ₱408,408 base sa standard drug price. Narekober usab ang usa ka .45 caliber pistol, samtang ang laing armas nga giingong gigamit sa pagpatay kang Konsehal Diamante narekober usab didto sa dakbayan sa Mandaue.
Ang suspek kasamtangang gitanggong sa Police Station 6 samtang giandam ang mga kasong paglapas sa Sections 5 ug 11, Article II sa Republic Act 9165 (Comprehensive Dangerous Drugs Act of 2002) ug Republic Act 10591 (Comprehensive Firearms and Ammunition Regulation Act), gawas pa sa kasong murder nga ipasaka batok kaniya.
Sumala ni PCOL Ylanan, ang pagdakop sa suspek ug ang pagkabungkag sa maong gun-for-hire group nagpakita sa seryosong tinguha sa kapulisan nga makab-ot ang hustisya alang sa biktima ug maseguro ang seguridad sa tibuok Dakbayan sa Sugbo.
