CEBU CITY- Opisyal nga gipahigayon sa Dakbayan sa Sugbo ang Pre-Departure Program para sa mga student-athletes niini nga makigtigi sa Central Visayas Regional Athletic Association (CVIRAA) 2026, nga gipahigayon sa Zapatera Elementary School niadtong Marso 20, 2026.
Ang kalihokan nagtigom sa mga atleta, coach, ug mga opisyal isip pagpakita sa panaghiusa ug suporta samtang ang delegasyon nangandam sa pagrepresentar sa Dakbayan sa Sugbo sa rehiyonal nga kalihokan sa paugnat sa kusog nga gipahigayon sa Dakbayan sa Naga, Cebu.
Gisugdan ang maong kalihokan sa usa ka Santos nga Misa, gisundan sa usa ka pormal nga seremonya nga naglakip sa presentasyon sa delegasyon sa Dakbayan sa Sugbo ug mga mensahe gikan sa mga importanteng lider sa edukasyon ug lokal nga gobyerno.
Subay niini. si Cebu City Mayor Nestor D. Archival nipadangat sa usa ka makapadasig nga mensahe ngaadto sa mga batan-ong atleta nga makigtigi nga adunay disiplina, garbo, ug integridad.
Ang kalihokan giorganisar uban sa koordinasyon sa Department of Education Cebu City Division ug sa Cebu City Government, nga nagpalig-on sa pasalig sa siyudad sa pagpalambo sa kabatan-onan pinaagi sa paugnat sa kusog.
Ubos sa temang “United in Sports,” ang mga atleta sa Cebu City mopadulong na sa CVIRAA 2026 uban ang lig-on nga suporta sa komunidad ug taas nga paglaum alang sa kahusayan.
