Hugot nga nagmonitor sa mga presyo sa mga tambal ang Department of Health (DOH) human sa nagpadayon nga krisis sa lana, matod sa ahensya niadtong Biyernes, Marso 27, 2026.
Sumala sa tigpamaba ug Undersecretary sa DOH nga si Albert Domingo, ang ilang pagmonitor nagpadayon samtang ang ubang mga lakang sama sa mga pagsusi sa imbentaryo ug contingency planning kay gipatuman usab, labi na sa mga tambalanan sa DOH, aron masiguro nga ang suplay sa mga tambal ug mga medical supplies kay dili mabalda.
Kaniadto ang DOH miingon nga nagpadayon kini sa pagmonitor sa mga presyo sa mga tambal ug kagamitan niini human ang usa ka ekonomista nagpasidaan nga ang inflation mahimong makaapekto sa sektor sa panglawas tungod sa krisis sa Middle East.
Dugang ni Domingo nga kinahanglan sigurohon sa PhilHealth nga makasunod kini sa gilauman nga pagtaas sa panginahanglan alang sa mga serbisyo sa panglawas.
Samtang, giawhag niya ang publiko nga masabtan ang pagkabungkag o “pag-unbundling” sa mga singil sa mga pribadong ospital, labi na taliwala sa pagsaka sa mga presyo tungod sa inflation.
Dugang niya nga mas masabtan sa publiko ang pagtaas sa mga singil kung klaro ang pagkabungkag niini, ug nga ang DOH makatabang usab pinaagi sa Zero Balance Billing ug PhilHealth pinaagi sa hustong mga benepisyo.
