CEBU CITY- Mitingog na sa pinakaunang higayon ang kanhi aktor, content creator, ug inhenyerong si Slater Young nga usa sa mga developer sa kontrobersyal nga Monterrazas de Cebu sa Barangay Guadalupe ning dakbayan sa Sugbo.
Gipost Young ang iyang video statement pinaagi sa iyang Facebook page niadtong Dominggo sa gabii, Abril 19.
Sumala pa niini nga gibuhat niya ang pagsapublikar sa iyang habig human mitingog ang parent company sa maong development project nga Mont Property Group sa ilang pagpanghunaw sa kadaot nga mugna sa ilang real estate development sa kabukiran sa Barangay Guadalupe.
Gani sa bag-ohay lang mimando ang Department of Environment and Natural Resources (DENR) sa paglibkas sa cessation of operations order (CDO) batok sa Monterrazas.
Sa pamahayag ni Young, gisaysay niini nga nagbakho sab ang iyang pamilya sa masulob-ong panghitabo sa pagkuso-kuso sa Bagyong Tino niadtong nakalabayng Nobyembre 4, 2025. Apan namahayag ang inhenyero bahin sa daw ispekulasyon sa ilang proyektong nag-opaw og bukid kay wala dayon nila tubaga aron ipaligid ang imbestigasyon kung aduna bagyud silay salaod sa pagbaha sa habagatang bahin sa dakbayan sa Sugbo atol sa bagyo.
Gisaysay pud ni Young ang nadawat nga kritisismo sa iyang pamilya nga mga personalidad sa internet sa daw pipila ka mga komento sa mga tawo nila nga nakapasakit na sa ilang dughan.
Gipunto niini nga adunay pagtuon gikan sa University of the Philippines nga nagpamatuod nga ang ilang earth-moving ug uban pang kalihokan kabahin sa development sa Monterrazas kay walay direktang epekto sa grabeng pagbaha kun di ang hilabihan ra gyud nga bundak sa uwan mugna sa bagyo.
Giklaro niini nga bisan og wala daw ang ilang proyekto kay mubunok gihapon ang baha sa Sugbo niadtong higayon tungod kay ang Bagyong Tino kay mibubo og kapin usa ka buwan nga uwan sa syudad atol sa pagpanghasi niini.
Gipasigarbo ni Young nga ang Monterrazas kay wala lamang nakatuman sa mga rekisitos sa balaod apan nakalapas pa kini sa tanang regulasyon sa gipunto niining 99.74% sa excess rainwater nga nakuha sa ilang mga detention ponds gikan sa ilang luna sa kataas sa paglabay sa bagyo.
Pagklaro niini sa pagbalik nga Monterrazas de Cebu wala nakatampo o nakapahinungod sa pagbanlas sa baha sa ubos nga bahin sa syudad nga nakaabag pa gani ang sistema ang ilang gitukod sukwahi sa pangangkon nga silay hinungdan sa katalagman.
Hinaot niini nga dili na sila pasanginlan sa delubyong gidala sa Bagyong Tino ug manukad sa pagtuon ang kritisismo sa ilaha dungan sa pagsibya nga mutahod sila basta dili lang kini misinformation kay kung sa higayon kay andam silang mubuhat sa tukmang aksyon bahin niini.
Namalandong pa kini nga ang Sugbo nanginahanglan og tiunay nga solusyon sa mga gisagubang sa problema nga mamugna lang sa pagtumbok sa tukmang tinubdan sa kakuwang o kasaypanan ilabi na sa imprastruktura sa syudad.
Kahinumduman nga gibaha sa mga netizens og pagsaway si Young human sa pag-igo sa Bagyong Tino mugna sa grabeng pagbaha nga nasinati nga gipanglantawan sa mga lumulupyo sa ubos nga bahin sa syudad ang anapog nga nabanlas sa baha kay gikan sa pag-opaw sa bukid sa Monterrazas nga hambugerong gipasigarbo sa inhenyero sa mga vlog contents niini sa mga nakalabayng katuigan.
