Napugos ang Swiss International Air Lines sa paghunong sa pag-takeoff sa ilang flight gikan sa Delhi paingon sa Zurich gahapong adlawa human sa problema sa makina.
Sumala sa airline, upat ka pasahero ug usa ka tripulante ang nasamdan sa insidente.
Basi sa report sa mga awtoridad, usa sa mga makina sa eroplano ang nasunog samtang nag-accelerate sa runway, hinungdan nga gikanselar dayon ang flight ug gihimo ang emergency evacuation.
Ang eroplano, usa ka Airbus A330, adunay sakay nga 228 ka pasahero, lakip ang upat ka masuso, ug 13 ka tripulante.
Samtang, temporaryong nideklarar ang Indira Gandhi International Airport og emergency human sa insidente, nga sa ulahi mibalik sa normal nga operasyon sa runway.
Ang mga nasamdan nga pasahero gidala na sa ospital, samtang ang tripulante naangol sa buolbuol.
Samtang, ang Swiss International nagpahigayon og imbestigasyon pinaagi sa usa ka task force nga giumol aron mahibal-an ang hinungdan sa problema sa makina.
