Gipasaka ang security alert sa U.S. Embassy sa Manila human sa pagkamatay sa duha ka Filipino-American sa engkwentro tali sa militar ug sa New People’s Army (NPA) sa Toboso, Negros Occidental niadtong Abril 19.
Tungod niini, gitambagan sa embahada ang mga lungsuranon sa Estados Unidos nga likayan ang mga lugar nga adunay aktibong operasyon sa militar, lakip ang Negros, Leyte, Samar, ug Mindoro.
Giila sa gobyerno sa Estados Unidos ug Pilipinas ang NPA isip usa ka foreign terrorist organization.
Giingon usab sa embahada nga ang mga Amerikano kinahanglan mag-amping kon mobiyahe sa mga rural nga lugar ug mobiya dayon kung makamatikod og presensya sa armadong grupo.
Sa laing bahin, nagpagawas usab og Demonstration Alert ang embahada kalabot sa mga giplanong protesta sa Labor Day sa Metro Manila.
Gitambagan ang mga Amerikano nga likayan ang dagkong panagtapok aron malikayan ang posibleng kagubot ug masiguro ang ilang kaluwasan.
Ang maong alerto kabahin sa gipahugtan nga security advisory sa U.S. Embassy sa Pilipinas.
