Gipadayag sa pangulo sa usa ka human rights organization sa Myanmar ang iyang kahiubos sa nahimong lakang sa Association of Southeast Asian Nations aron sa paghatag ug solusyon sa nagpadayon nga humanitarian krisis nga gimugna sa military junta sa nasud nga Myanmar.
Kini ang gikabutyag ni Khin Ohmar, pangulo sa usa ka human rights organization sa myanmar diin ilang gisupak ang pag-ila sa mga nasud nga sakop sa ASEAN sa military junta isip lehitimo nga gobyerno sa maong nasud nga gipangulohan karon ni General Min Aung Hlaing, kinsa pwersahang miilog sa gahum niadtong Pebrero 2021 pinaagi sa usa ka kudeta batok sa civilian government nga gipangulohan ni Aung San Suu Kyi.
Panawagan sa grupo nga tabangan sa pagpabalik sa demokrasya pinaagi sa pagpugos sa military junta sa pagpahigayon og gawasnon nga eleksyon sa Myanmar ug pag imbestigar sa political persecution og human rights violation sa mao nga nasud.
Dugang ni Ohmar, nga ang ilang panawagan dili lang basta panawagan, apan pag-aghat sa ASEAN nga sulbaron ang gisagubang nga krisis sa ilang nasud pinaagi sa pagpatuman sa 5 point concensus.
Gihimug-atan niini nga gawas sa 5 point concensus nga kinahanglan nga matuman alang sa mga konstituwente sa ASEAN, Inay kinahanglan nga maspalapdan pa ang ilang kapasidad og manawagan sa kagamhanan sa Myanmar nga tapuson ang bayolenting panggobyerno.
