BOMBO EXCLUSIVE: Posibleng adunay “bayaran” nga nalambigit sa pagbotar sa pipila ka mga miyembro sa House of Representatives pabor sa pagpadala sa Articles of Impeachment batok kang Vice President Sara Duterte ngadto sa Senado.
Kini maoy gipadayag ni kanhi Presidential Legal Counsel Atty.Salvador Panelo atol sa eksklusibong pakighinabi sa Bombo Radyo news team, bisan pa man og iyang giingong wala niya gikuwestiyon ang desisyon sa Kamara.
Matod ni Panelo, pipila ka adlaw sa wala pa ang botohan, adunay nanggawas nga mga hungihong nga ang matag kongresistang mobotar og “yes” giingong makadawat og P200 milyon nga cash ug dugang nga P200 milyon alang sa infrastructure projects. Samtang adunay uban nga kongresista nga giingong makadawat og P30 milyon nga cash ug P400 milyon nga pondo alang sa infrastructure projects.
Giingon ni Panelo nga kung adunay kamatuoran ang maong mga alegasyon, posible nga maoy hinungdan nga misaka pa ang gidaghanon sa mga mibotar pabor sa impeachment complaint.
Dugang pa niya nga posibleng adunay mga kongresista nga naghunahuna nga dili na maapektuhan ang resulta sa kaso sa Senado, busa mipili na lamang sila sa pag-uyon tungod sa posible nga ayuda o pondo nga ilang madawat alang sa ilang mga constituents.
Sa dihang gipangutana kung tinuod ba ang mga alegasyon ni Batangas 1st District Rep. Leandro Legarda Leviste kabahin sa bayaran, mitubag si Panelo nga dili niya kini makumpirma apan posible kini ilabi na kay adunay mga nanglutaw nga hungihong.
Matod pa niya, ang mga kongresista lamang ang makahibalo sa tinuod nga nahitabo.
Bisan pa niini, gipasiugda ni Panelo nga iyang gitahod ang institusyon sa House of Representatives, apan nagpabilin ang iyang obserbasyon nga adunay mga isyu nga kinahanglan pang klaruhon bahin sa proseso sa pag-aprobar sa impeachment complaint.
