Mihangyo ang legal team ni kanhi Presidente Rodrigo Duterte sa International Criminal Court nga i-postpone ang pagsugod sa trial proceedings sulod sa 19 ka bulan.
Kini misunod human sa pagkumpirma sa mga kaso batok kang Duterte niadtong Abril 23, 2026.
Sa mosyon nga gisang-at sa bag-ong lead counsel ni Duterte nga si Peter Haynes ngadto sa ICC Trial Chamber III, giingon nga kinahanglan pa nila og dugang nga panahon aron maandam ang depensa sa kaso.
Gipunting usab sa abogado nga sa nangaging mga kaso sa ICC, kasagaran magsugod ang trial sa 14 hangtod 19 ka bulan human makumpirma ang mga kaso.
Kung maaprobahan ang ilang hangyo, mahimong ibalhin ang trial tali sa Hunyo ug Nobyembre 2027.
Sukwahi kini sa posisyon sa prosekusyon nga gustong magsugod ang trial sa Nobyembre 30, 2026, o wala pay walo ka bulan human sa pagkumpirma sa mga kaso.
Dugang pa sa depensa, dili pa angay nga magtakda dayon og petsa sa trial tungod sa nagpadayon nga mga isyu nga posibleng makaapekto sa proseso sa husay.
Matod ni Haynes, kinahanglan unang masuta sa Trial Chamber kung si Duterte ba angayan pa nga moatubang sa trial.
Bisan og giila sa depensa ang medical examination nga gihimo sa kanhi presidente atol sa pre-trial phase, ilang giingon nga padayon nga nagkagrabe ang iyang kondisyon ug kinahanglan pa kining masusi pag-ayo sa dili pa magsugod ang bisan unsang pagdungong.
