Gisugdan na sa Kagamhanan sa Dakbayan sa Sugbo, pinaagi sa Cebu City Disaster Risk Reduction and Management Office (CCDRRMO), ang pagpangandam alang sa sunod-sunod nga refresher courses bahin sa earthquake preparedness ug response alang sa mga opisyal ug responders sa mga barangay karong buwana sa Hunyo.
Kini nga lakang kabahin sa tinguha sa siyudad nga makamugna og mas luwas ug mas lig-on nga mga komunidad batok sa kalamidad.
Gihan-ay na ang mga petsa alang sa maong pagbansay diin ang mga barangay sa amihanang distrito (Northern District) gikatakda sa Hunyo 28, samtang ang habagatang distrito (Southern District) ipahigayon sa Hunyo 29.
Gisaysay ni Cebu City Councilor Dave Tumulak, ang Chairperson sa Committee on Disaster Risk Reduction and Management, nga mahinungdanon kaayo ang padayon nga pagpalambo sa katakos sa mga barangay sa pagresponde.
Kini nga inisyatiba gilusad human sa mga nangaging linog nga nitay-og sa pipila ka bahin sa Mindanao aron mas mapalig-on ang kaandam sa mga lokal nga dapit batok sa bisan unsang emergency.
Makadawat ang mga partisipante og mga labing bag-ong impormasyon ug praktikal nga pagbansay sa emergency response operations, mass casualty incident management, domain awareness, ug disaster coordination.
Gidisenyo usab kini nga kurso aron masangkapan ang mga lider sa barangay ug frontline responders sa saktong kahibalo ug kahanas sa pagpanalipod sa kinabuhi sa mga molupyo.
