Nagpaspas karon ang Metropolitan Cebu Water District (MCWD) sa ilang mga proyekto sa suplay sa tubig isip pangandam sa gilauman nga epekto sa El Niño sa mga tinubdan sa tubig sa Metro Cebu.
Matud ni MCWD General Manager Atty. DX Lapid, naghimo sila og nagkalain-laing lakang aron mapausbaw ang suplay, sama sa pagkalot og 11 ka bag-ong production wells sa Cebu City, pagpaandar sa mga standby nga atabay, ug pag-abli sa dugang tuboran sama sa Kalunasan Well.
Giestudiyohan usab nila ang mga proyekto sa desalination, Mambaling water supply, ug ang proyekto didto sa Cordova.
Sa usa ka press briefing niadtong Miyerkules, Hunyo 17, gipahayag ni Lapid nga sige ang ilang pakig-alayon sa PAGASA aron ma-monitor ang dagan sa panahon. Subay sa report sa PAGASA, anaa sa kapin 80% ang tsansa nga mosulod ang grabeng El Niño, diin gilauman nga mas bation ang epekto niini sa unang bahin sa tuig 2027 ug mamahimong molungtad hangtod sa Hunyo sa maong tuig.
Matud ni Lapid, anaa na ang kondisyon sa El Niño bisan pa man kon nasinati pa karon ang ting-ulan.
Sa pagkakaron, ang MCWD nag-produce og banabana nga 153 milyones ka litro sa tubig matag adlaw gikan sa ilang kaugalingong mga tinubdan, ug giklaro ni Lapid nga ang namatikdan nga pag-ubos sa tubig sa pipila ka dapit tungod pa lang sa miaging ting-init ug dili pa direktang epekto sa El Niño.
Apil sa ilang gi-monitor pag-ayo mao ang Lusaran River ug ang pasilidad sa Jaclupan nga maoy nagsilbing tinubdan sa tubig sa daghang barangay sa habagatang bahin sa Cebu City.
Aron masiguro nga dili dako ang kakuwangon kon moubos ang produksyon sa Jaclupan, plano sa MCWD nga banhawon ang ilang 2019 nga proposal. Kini mao ang pagpataod og mga deep well o lawom nga atabay sa walo ka publikong tunghaan sa Cebu City, ilabi na sa habagatan.
Nagpadala na sila og follow-up letter sa Kagamhanan sa Dakbayan sa Sugbo ug naghulat na lang sa memorandum of agreement aron masugdan kini, nga magsilbing dinalian nga tabang sa mga komunidad kon pananglit mag-uga ang Jaclupan tungod sa huwaw.
