PROVINCE OF CEBU- Gipatuman ni Dumanjug Mayor Gungun Gica ang “total ban” sa pagdala ug paggamit og cellphone sa tanang tunghaan sa lungsod sugod karong Lunes, Hunyo 29.
Ubos sa maong polisiya, ang bisan unsang cellphone nga makumpiska gikan sa estudyante dili na iuli hangtod sa matapos ang tibuok school year.
Sa iyang mensahe, giingon sa mayor nga ang mga ginikanan nga dili mouyon sa maong patakaran gawasnon nga mobalhin sa ilang mga anak ngadto sa laing munisipyo.
Matud ni Gica, ang nag-unang katuyoan sa polisiya mao ang pag-awhag sa mga estudyante nga mas magpokus sa pagbasa, pagtuon, ug pagpakig-istorya o pakig-halubilo sa ilang mga klasmet samtang anaa sa eskwelahan.
Gidugang usab niya nga adunay dakong papel ang mga ginikanan sa paggiya sa ilang mga anak sa panimalay aron masubay ang ilang pagkat-on ug mapalig-on ang maayong relasyon sa pamilya.
Samtang naghulat sa hingpit nga pagpatuman sa polisiya, gipahibalo usab ni Gica nga nagplano ang lokal nga kagamhanan sa pagpalit og mga school bus aron masiguro ang luwas nga pagpauli sa mga estudyante.
Gikatakdang makigtagbo ang mayor sa tanang school heads sa lungsod karong Lunes alas-1 sa hapon aron hisgutan ug plantsahon ang mga detalye sa implementasyon sa maong polisiya.
