CEBU CITY- Gipaniguro sa convenor sa election watchdog Kontradaya nga si Prof. Danilo Arao nga nagpadayon ug buhi pa ang kasong perjury nga ilang gisang-at batok kang Senador Rodante Marcoleta, luyo sa bulag nga kasong plunder nga giatubang niini sa Ombudsman.
Sumala ni Arao, wala pa silay nadawat nga notice gikan sa Ombudsman nga nagbasura sa ilang reklamo.
Gani, sa pinakabag-ong komunikasyon kanila, gipahibalo nga giproseso pa ang kaso ug nangayo na ang Ombudsman og opisyal nga opinyon gikan sa Commission on Elections (Comelec) bahin sa isyu sa Statement of Contributions and Expenditures (SOCE) sa senador.
Nasayran nga ang reklamo sa perjury nga gisang-at niadtong Disyembre naggikan sa giingong nagkasumpaki nga mga pahayag ni Marcoleta kabahin sa iyang mga kontribusyon sa kampanya.
Nagtuo si Arao nga gigamit sa Ombudsman ang pipila sa ilang mga ebidensya sa pagsang-at sa kasong plunder, dungan sa pagdugang og mga bag-ong impormasyon lakip na ang pag-ila sa mga donor nga mihatag og labing menos ₱75 milyon.
Gipasiugda ni Arao nga obligasyon sa matag kandidato ang hingpit ug matinud-anong pagdeklarar sa tanang donasyon sa kampanya sa ilang SOCE.
Iyang giinsistir nga ang tinguha sa mga donor nga dili magpaila o pribado dili igo nga rason aron ideklarar nga “zero” ang nadawat nga kontribusyon.
Giklaro usab sa Kontradaya nga ang motu proprio nga imbestigasyon sa Comelec lahi sa ilang gisang-at nga reklamo.
Matod ni Arao, bisan unsa pa ang mamahimong desisyon sa Comelec sa kaugalingon niining pakisusi, kinahanglan gihapon nga desisyunan ug sulbaron ang ilang reklamo sa perjury.
Bisan tuod og iyang giangkon nga mas seryoso ang kasong plunder tungod kay dili kini mapiyansahan, gipahayag ni Arao nga dili gihapon angay pakaminuson ang perjury tungod kay mahimo kining moresulta sa pagkatangtang sa katungdanan ug permanente nga diskwalipikasyon sa pagdagan sa bisan unsang pampublikong posisyon kon mapamatud-ang sad-an.
